0

اٹلی پاکستان کے ساتھ تعلیمی تعاون بڑھانے کا خواہاں

اسلام آباد (پی ٹی وی نیوز) اٹلی نے پاکستان کے ساتھ تعلیمی تعاون بڑھانے میں گہری دلچسپی ظاہر کی ہے۔ منگل کو اطالوی وفد نے پارلیمنٹ ہاؤس میں چیئرمین سینیٹ سید یوسف رضا گیلانی سے ملاقات کی جس میں وفد نے بتایا کہ تقریباً 30 اطالوی جامعات میں تقریباً 3,500 پاکستانی طلبہ زیر تعلیم ہیں اور دونوں ممالک کی جامعات کے درمیان معاہدے موجود ہیں۔ وفد میں اٹلی کے سیکریٹری جنرل برائے امور خارجہ ریکارڈو گوارگلیا، پاکستان میں اطالوی سفیر اوگو چیارلاتانی، ڈائریکٹر جنرل نکولٹا بومبارڈیئر اور ڈپٹی ہیڈ آف مشن رابرٹو نیچا شامل تھے۔ وفد نے صحت، پیشہ ورانہ تعلیم اور ثقافتی ورثے کے تحفظ میں تعاون کی گنجائش بھی بتائی اور اسلام آباد میں اٹلی کی نئی سفارت خانے کی عمارت کے افتتاح سے آگاہ کیا۔ گیلانی نے فیصل آباد میں پاکستان اٹلی ٹیکسٹائل سینٹر اور لاہور میں فٹ ویئر سینٹر کے ذریعے تکنیکی تعلیم میں اٹلی کے تعاون اور گندھارا تہذیب کے تحفظ میں اس کے کردار کو سراہا۔

اس خبر پر اپنی رائے کا اظہار کریں